नुवाकोट– विदुर नगरपालिका–९ खड्कथोक सडकमा मोटरसाइकल दुर्घटना हुँदा तीन जनाको मृत्यु भएको छ ।

बा ९९ प ८२०२ नम्बरको पल्सर मोटरसाइकल अनियन्त्रित भई सडकबाट करिब १०० मिटर तल खसेर दुर्घटना भएको हो ।

उक्त मोटरसाइकल सोमबार पौने ११ बजे भौरुमकोटबाट तल कोलनीतर्फ आउँदै गरेको प्रहरीले जनाएको छ ।

दुर्घटनामा मोटरसाइकल चालक धादिङको खनियाबास गाउँपालिका–५ घर भई हाल विदुर नगरपालिका–९ बस्दै आएका ४७ वर्षीय बुद्धिमान तामाङ, विदुर नगरपालिका–१३ की ३१ वर्षीया बिन्दा थापा मगर र सोही ठाउँकी २७ वर्षीया सुनिता थापा मगरको मृत्यु भएको बताइएको छ ।

दुर्घटनामा घाइते भएका तीनै जनाको जिल्ला अस्पताल त्रिशूलीमा उपचारका क्रममा मृत्यु भएको प्रहरीले जनाएको छ ।
घटनाबारे थप अनुसन्धान तथा आवश्यक कानुनी प्रक्रिया अघि बढाइएको जिल्ला प्रहरी कार्यालय नुवाकोटले जनाएको छ ।